文_陳建中 圖_Angel
11/27下晡參加 牽囡仔ê手 行台語ê路 舉辦（kír-pān）的三峽老街導覽活動，痟讚–ê
這个機會予我熟似佇祖師廟（Tsóo-sir-biō）工作 19 冬的 黃君琪 老師，伊捌足濟（tserē）三峽的歷史佮文化，內容比我平常時招呼朋友來踅老街會講的閣較深閣較闊，規个老街的店頭伊攏捌，每一塊（tèr）磚仔伊攏講的出故事，是我自（tsīr）細漢（suè-hàn）時就足欣羨的彼款人。三峽對伊來講干焦有兩種人：一種是伊的朋友，另外一種是伊的準朋友。
蹛三峽22冬以來，頭一擺熟似啥物是三峽在地的安溪泉腔，不止仔感動，嘛深刻的感受著我所蹛的土地已經失去偌濟應該愛傳承的文化資本。過去的錯誤政策佮教育發展，致使這馬人毋捌在地的故事，在地的語言佮得愈欲（berh）絕種，tsīr細漢以來，我佇三峽就干焦聽著華語（gír）爾。
若是無拄著黃仙，我就無緣知影佇長老教會（細漢時捌 khìr 遐做花童（hua-tông）的所在）竟然就有臺語聖經；無緣知影三峽有一个漢學仔仙傅萬壽（Pòo Bān-siū）老師會教人讀漢詩；無緣看著老街內底的漢藥房頭家𪜶阿公著獎的相片；無緣聽著佇廖添丁遊戲內底的彼箍抗日人物蘇力竟然就蹛三峽老街媽祖宮隔壁，𪜶（in）厝後來就變做這馬媽祖宮的一部份；無緣感受著廟埕的戴記茶坊𪜶（in）兜的茶有偌𠢕（gâu）偌好啉…… 我自（tsīr）高中以來就無開啥物時間認捌三峽，囡仔時聽著的故事得欲（berh）袂記矣，好佳哉有今仔日黃仙共我補課，共足濟重要的物件抾轉來，予坱埃的記持不再共放袂記。
向望我未來我會成做一个有文化有故事的人，無論我蹛佗一个所在，做啥物工課，攏愛用心過生活，認捌身軀邊的人、歷史、故事佮文化。