《黃金陣佮烏風幔》

真歡喜看著《小封神》ê故事有台語版矣！馬扁禪師佮眾神ê鬥法，配搭咱逐家攏袂生份ê洪福田老師ê尪仔圖，予人真期待！

逐家敢知影《小封神》？

伊是日本時期ê作家許丙丁先生，以台南市ê廟寺做背景所編出來，將神明精怪擬人化，佮咱人間ê世事仝款，規陣咧捙跋反ê神怪故事。

這本囡仔冊就是掠《小封神》內底ê一段故事出來改編，主角是「馬扁仙」（原文做馬扁禪師），「馬扁」是啥物？免懷疑，「馬扁」就是「騙」！

毋但咱這馬ê人有按呢咧用，佇1931年出版ê字典《臺日新辭書》就已經有收「馬扁」這个用法矣，自本《小封神》這本冊ê創作就有剾洗民間迷信ê用意，看作者按呢號名，咱就看會出伊詼諧ê所在。

故事上頭仔，先共咱介紹主角馬扁仙，伊上愛金爍爍ê物件，而且閣有神通，伊毋但有𠕇khong-khong、毋驚刀槍 ê皮，閣有一項會當歕出烏幕ê法寶！

紲咧馬扁仙本成是為著欲保護伊心愛ê搭壁黃（黃鵪菜），展出伊烏風幔ê法術， 好大膽去共李天王偷提混元金斗，尾後煞* it著混元金斗ê好空，起貪迷想欲霸占牢咧！才來引起了佮李天王、三太子、雷震子以及七娘媽之間ê捙拚鬥法，眾人大戰兩回合，結果予人拍出原形…..

欲知劇情發展如何，毋免等後回，趕緊來看《黃金陣佮烏風幔》！

故事內面主要有7个角色，除了小上帝佮龜精以外，各人攏有各人ê法寶：

馬扁仙ê烏風幔

托塔天王李靖ê黃金塔、混元金斗

三太子李哪吒ê黃金風火輪

雷震子ê黃金棍

七娘媽ê照妖鏡

遮ê金爍爍ê法寶實在唌人目，也就是故事標題所講ê黃金陣，看著就誠厲害！

毋但故事精彩，閣配搭 #洪福田 老師ê尪仔圖，活龍龍活跳跳，恁共看ê李天王氣甲歪腰ê面腔，馬扁仙貪心ê模樣（後壁面閣有風力發電neh！），干焦看圖就鬧熱甲有賰，洪老師這規冬出版真濟真好看台文作品，看著伊ê圖，就知影品質是掛保證！

 

《小封神》原著是用台語漢文寫作ê章回體小說，故事真精彩，毋過對這馬ê人來講有較僫讀，戰後作者捌改寫做華語佮bàng-gah圖重新出版，市面上嘛已經有華語ê兒童版。

這擺國立臺灣文學館將其中一部份ê故事改編做台語畫本《黃金陣佮烏風幔》出版，內容活潑，尪仔圖出色，用輕鬆ê方式予閣較濟人知影，原來咱有這本用台灣民間信仰來寫作ê神怪故事，嘛予咱台灣ê大人囡仔ê頭殼內攏加添一分屬於咱人在來ê智識，愈在地才有通愈國際，希望會當引起閣較濟人ê興趣，毋但是囡仔古，有一日閣通見著台譯版ê全本《小封神》。

 

*it著：想欲愛、向望