Q: 學校台語課教的跟家裡講的不一樣，怎麼辦?

有一寡家長會煩惱：

囡仔讀小學了後有台語課，

學校老師的講法佮發音，佮厝內講的無仝款，欲按怎？

 

阮囝讀一年仔，聯絡簿仔提醒今仔日愛讀台語課文，請家長鬥相共複習。

我問伊敢會曉？伊隨背予我聽，其中一字的聲調（第八調）佮阮咧講的無相siâng。

相信逐家若猶未拄著這款情形，嘛加減捌看著新聞抑是一寡無理性的批評，講老師教的佮厝裡講的攏無仝款，台語攏去予教育部烏白舞、創歹了了！

窮實講，批評的人，凡勢真大部份佇厝裡就無咧和囡仔講台語矣，等囡仔對學校學轉來，才氣怫怫共囡仔講老師教的毋著。

囡仔的台語現都對老師遐學來的，家長雄雄跳出來共囡仔講按呢毋著，按呢是欲愛伊聽啥人的？

 

學校老師有根據咱在地的腔口去教學無

學校老師有法度分辨包容囡仔無仝的腔口差無

這咱可能無法度控制，總是老師有伊佇學校教學作業的標準，咱尊重伊的做法。

毋過實在講，#只要咱厝裡有咧繼續佮囡仔講台語，#就毋免驚囡仔共咱家己的話放袂記。

（另外一方面，這馬台語已經強欲火hua去矣，台語文教育進入體制予台語「求生存」，總是會有一寡標準化的過程，無法度齊顧逐个人的無仝。）

這馬交通真利便，無仝所在的人互相交陪來去，閣坐佇厝裡看電視、網路影片等等，嘛攏會聽著各種的口音，腔口加減透濫著，是真四常的代誌。

我的囡仔嘛捌學別人的腔口咧講話，我問伊是對佗位學來的？

伊應我講都某乜朋友矣！伊攏是按呢講話～

一方面我感覺囡仔真有學習模仿的能力，一方面囡仔家己嘛感覺用無仝款的聲調講話真趣味。

（最近伊閣發現阮兜自用車𤆬路機的台語發音佮阮無仝neh！）

有的家長講，我欲共囡仔改–過來，伊嘛毋聽我的，偌欲氣–死！

我的建議是，咱攏知影真濟囡仔會共老師講的話當做「聖旨」，毋管是為著分數也好，為著老師的權威性也好。

若佇台語這方面，咱會使試看覓

用開講的口氣予囡仔了解，台語本底就有真濟無仝的講法、發音、聲調，老師是按呢講，若咱兜是按呢講。

準講囡仔無法度聽入去，感覺愛照老師教的，嘛無要緊，咱已經有講予伊知，就先到遮擋恬，只要咱若是有繼續佮伊講台語，等kah伊較大漢、較捌代誌了後，總是會體會著啥物才是咱厝內家己人的話，嘛予囡仔學會曉尊重別人佮咱無仝款的腔口。

 

有一句話講「離鄉無離腔」，就算出外去，嘛袂共咱家己的語言特色放袂記。

咱會使換一个角度來想，有機會接觸著別人佮咱的「無仝」，才會當予咱知影「咱家己」生成是啥物形，敢毋是？