《變聲偵探》台語版

昨暗足感動，一、二十个台語囡仔佇公園包場𨑨迌，閣當齊去看戲，六七年來做伙大漢ê台語伴差不多攏來–ah，是囡仔當初閣佇塗跤爬ê時就熟似ê朋友–neh

大部分囡仔讀冊了後無法度繼續共學，毋過這馬會當藉著台語活動閣相招，見面直接切做全台語頻道 看著規場ê台語囡仔實在真歡喜。

這擺阮相招看ê「 #變聲偵探」世界好笑，我足罕咧享受這款「純娛樂」 兩个演員ê口技、演技攏是一等一，大錢阿兄（錢君銜）誠實有本領，看伊功夫盡展kah阿仁（許家瑋）盤喙錦(pôaⁿ-chhùi-gím)，hō͘大人囡仔囡仔自頭笑到尾，真正是點半鐘攏無冷場！

感謝劇團用心，導演黃致凱開演進前特別來替阮介紹劇場ê表演手法，規齣戲99%台語演出（配有台華雙語字幕），台詞正範、媠氣、閣笑詼(chhiò-khoe)，這款劇本若是提來做教材一定蓋受囡仔歡迎 演員演技好，配合簡單ê服裝道具，四歲囡仔嘛看有，笑kah強beh反–過。
囡仔講大錢阿兄一个人搬五个角色有夠厲害，這款劇本毋知按怎編–出-來–ê？總–是，想到這馬台語人嘛有這款水準ê戲通好欣賞，而且閣有遮爾濟 #有才調直接享受台語演出ê囡仔，這是第二个感動

故事工廠ê《變聲偵探》台語版，一个人kan-na 100箍真正是俗kah無道理，感謝 文化部 #表演藝術台語主流化 計畫，支持用心ê表演團體用台語來創作！