（台語）
阮是一 tīn 因為「kah 囡仔講台語」才來熟似（se̍k-sāi）ê 媽媽，2018 年 4 月 初4做伙創立「牽囡仔ê手 行台語ê路」，向望（ǹg-bāng）透過這个專頁，通結連台語育囝（io-kiáⁿ）資源，記錄阮 kah 囡仔講台語 ê 心情 hām 經驗，hō͘ 仝款有心 chham 囡仔講台語 ê 爸母有一个靠山。
為著 hō͘ 大人 kah 囡仔有一个全面用台語互動交流 ê 空間，阮成立「台語路共學」，毋但（m̄-nā）為囡仔 chhōe 台語伴，mā 支持大人 kā 母語講–轉-來。這一冬，台語路攏總舉辦 47 擺室外共學，48 擺室內共學，參與家庭三十外戶，逐擺 ê 活動，攏是參加 ê 家長共同設計規劃–ê。共學 ê 時，囡仔自然用台語𨑨迌（chhit-thô）、參詳（chham-siông）、交陪（kau-pôe）；家長就相招學台文，mā 用台語開教養讀冊會，成做彼此育囝（io-kiáⁿ）路–lin ê 同伴（tâng-phōaⁿ）。
為著 hō͘ 閣較濟人意識–著講台語 ê 重要性，hō͘ 台語 tī 每一个人 ê 生活中 kah 社區–lin 湠（thòaⁿ）–開，阮開辦「台語路經驗分享會」，當面分享實際 ê 經驗 kah 方法，鼓勵家長開始 kah 囡仔講台語，mā 將「一區一个台語共學」當作阮 ê 目標，設法連結、促成各地台語共學團 ê 成立。阮相信，著愛四界攏有台語共學，台語才有才調向下（hiòng-hā）紮根（chat-kin）、tī 社區紮根。目前 4 擺「台語路經驗分享會」直接接觸著 44 个新 ê 家庭，北部已經有 桃園、新莊、三峽 ê 台語共學團，南部 mā 成立友團「#打狗囡仔台語共學團」。
Tī 華語強勢 ê 現實環境–lih，台語家庭 ê 需求需要 hō͘ 社會 kah 政府看重。阮向濟濟公家機關 hām 私人企業爭取增加台語導覽 ê 服務，安排家長 chhōa 囡仔行–出-去，用台語參觀博物館、去郵局寫批寄批、去苦茶園挽苦茶子、甚至去製麵工廠做麵，hō͘ 囡仔體驗著台語 mā 有豐富 ê 知識性 kah 生活性。這類型 ê 活動，半冬來辦過 14 擺，參與 ê 大人 kah 囡仔超過兩百个人次。舊年年尾，「國家語言發展法」通過了後，面對「台語電視台」成立 ê 爭議，阮 mā chhōa 囡仔參加記者會，透過實際 ê 行動予社會瞭解台語媒體 ê 重要性，積極參與關心公共領域 ê 政策進展（chìn-tián)。
台灣是一个多族群多語言 ê 國家，遮 ê 文化 kah 認同 beh 按怎來互相尊重、包容，一直是咱 ê 重要課題。今仔日 4/4 是「兒童節（Jî-tông-tsiat）」，三工後 4/7 是「言論自由日」，囡仔 hām 言論自由 攏是咱 ê 珍寶。這馬咱會使用家己 ê 話表達家己 ê 想法、大聲用母語唸冊 hō͘ 囡仔聽，著愛感謝過去濟濟先進 ê 拍拚，in 付出家己 ê 青春 kah 性命，爭取台灣 ê 民主 kah 自由。向望（ǹg-bāng）母語 kah 民主 ê 精神，通像種子仝款，tī 囡仔 ê 心–lih puh-íⁿ（發穎）、勇壯，有一工，成做一片 ām-phà-phà ê 樹林。
（華語）
我們是一群跟孩子說台語的媽媽。因為台語結緣的我們，在 2018 年 4 月 4 日成立「牽囡仔ê手 走台語ê路」這個粉絲專頁，希望透過這個粉絲頁，能夠分享台語育兒資源，記錄和孩子說台語的心路歷程與實際作法，讓有心陪伴孩子走台語路的父母，有一個堅實的後盾。
為了讓孩子與大人能夠有一個全面用台語互動交流的空間，我們成立了「台語路共學」，不只是為孩子找台語伴，更支持大人把遺忘的母語重新講回來。在這一年內，「台語路」總共舉辦過47次室外共學，和48次室內共學，參與家庭三十幾戶，每次的活動，都是由參加的家長們共同設計與規劃。孩子們在共學的過程中，自然用台語遊戲，也用台語與人互動、結交朋友；家長則共同學習台文，也用台語開教養讀書會，成為彼此台語育兒路上的夥伴。
為了喚起更多人說台語的意識，讓台語能深入每個人的生活與社區，我們舉辦「台語路經驗分享會」，面對面地分享實際的經驗和方法，鼓勵更多家長開始跟小孩講台語，並將「一區一個台語共學」作為我們的目標，設法連結、促成各地台語共學團的成立。我們認為，鼓勵大家自組台語共學，台語才能向下紮根、在社區紮根。目前4場「台語路經驗分享會」直接接觸到44個新家庭，北部地區，已經有了新莊台語共學團、三峽台語共學團與桃園台語共學團，南部也成立了友團「打狗囡仔台語共學團」。
在華語強勢的現實環境下，我們認為台語家庭的需求是真實存在，且需要被社會與政府重視的。我們向許多公共機構與公司行號爭取增加台語導覽的服務，由成人帶著孩子走出去，用台語參觀博物館、去郵局寫信寄信、到茶園採茶，甚至去製麵廠作麵條，讓孩子體驗到台語也有豐富的知識性與生活性的一面，這樣的活動共辦了14場，觸及大人小孩超過兩百個人次。在去年底「國家語言發展法」通過後，面對台語電視台成立與否的爭議，我們也帶著孩子出席記者會，用行動向社會呼籲台語媒介的重要性，積極參與公共領域的政策形成。
台灣是一個多族群多語言的國家，這些文化與認同間如何能夠相互尊重、包容，一直是我們這個社會的重要課題。今天4/4是「兒童節」，三天後4/7是「言論自由日」，兒童和言論自由都是我們的珍寶。現在我們能用自己的話表達意見，大聲用母語唸書給小孩聽，都要感謝過去許多前輩的奮鬥，他們付出了寶貴的青春與生命，打造台灣民主自由的體制。期盼母語和民主的精神，可以像種子一樣在孩子的心靈落地生根，在未來開出一片茂密的森林。
———
[圖] 招平常時無機會參加共學 ê 阿爸 kah 阿媽做伙來「台語路尾牙」，熟似（se̍k-sāi）其他台語家庭，鬥陣講台語！