仝一个概念，為怎樣台語佮華語ê用詞無仝？
最近編–ê讀大班ê囡仔teh學客語童謠〈油菜花〉，真好聽，阿母家己嘛想欲學，毋過我袂曉客語，聽袂準嘛唱袂準，囡仔愛我教伊唱，我講我無啥會曉，愛等我學–一下。
伊那看影片那問我：「這毋是攏有寫（漢）字，是按怎你袂曉讀？」
我講，就親像你定定問我：
平平一个概念，為怎樣台語佮華語ê用詞無仝？
平平一个漢字，為怎樣台語佮華語ê發音無仝？
仝款一个概念，台語佮華語是無相siâng ê語言，所以有伊家己ê用詞。仝款一个漢字，台語有台語ê讀法，華語有華語ê讀法，客語嘛有客語ê讀法，毋過我袂曉客語，所以我無法度直接讀予伊聽。
較早伊也捌問我一寡英語詞，我講我袂曉，伊嘛是想無：「平平是羅馬字，是按怎你袂曉？」趁機會共伊講，通世界真濟語言攏有用著羅馬字，毋但台語，英語、法語、日語等等嘛攏有leh用，咱若無學過就袂曉。
會記得我做囡仔ê時，上有印象ê例是地名，高雄ê「楠仔坑lâm-á-khenn」，華語講做「楠梓 ㄋㄢˊ ㄗˇ」，心肝內感覺奇怪，是按怎「楠梓 ㄋㄢˊ ㄗˇ」會讀做「楠仔坑lâm-á-khenn」？
雖然有怪奇音差遮濟，煞干焦對家己講：「原來『楠梓 ㄋㄢˊ ㄗˇ』嘛會用讀做『楠仔坑lâm-á-khenn』」，自按呢就ka準過。
彼當陣我已經leh讀國校仔，猶無台語有伊家己主體性ê概念，這馬咱台灣人ê母語進入教育體制，予咱ê囡仔自細漢就認捌漢字毋是干焦會當表達華語，羅馬字嘛毋是僅僅用來書寫英語，熟似世間ê多元性是真有幫贊。
想欲請逐家嘛來分享，佇你ê印象內底，頭擺有意識感受著台語佮華語有無仝，是啥物時陣？彼時ê你有啥物想法？歡迎來講看覓喔。