【牽囡仔ê手行台語ê路 X 樂心工作室－絹印體驗】
文：阿娟（拜二共學團成員）
這陣仔，阮兜囡仔三不五時就會問阮當時才會過年，我知影in攏足期待這咧節慶（閣有領紅包的時陣
）。所以，自我佇面冊專頁看著台語路佮樂心工作室欲合辦「手印紅包橐仔」的活動，就想講我定著愛𤆬囡仔來感受一咧。
活動彼工，頭家先細膩仔共阮紹介手印仔的流程，對選圖、揀色到印刷欲按怎操作，頭家猶未講煞，阮兜囡仔就佇我耳空邊直直講，一般的紅包橐仔攏是金色抑是銀色的圖，等ㄧ咧伊想欲選粉紅色佮茄仔色的色料，閣欲揀海翁佮小禮服的圖樣，按呢印出來的紅包橐仔，才是上特別–ê，別位攏買無的紅包橐仔。我聽了嘛足歡喜，感覺囡仔會使囥in家己的想法佇作品內底，按呢作出來的物件，對in來講，才是有感覺、有意義–ê。
除了作家己的紅包，主辦單位嘛足用心準備配搭的活動，起鼓先來一段「劍獅祈福」的講古，紹介台南安平遐的傳統慶典，大人囡仔攏聽了足認真；紲落閣有予囡仔擲筊領元寶手工餅仔的活動，攏是佮咱傳統節慶有關聯的安排。規的活動過程，囡仔毋但認捌一項技術，閣有體驗文化的氛圍，我相信會予囡仔留落來足無仝款的感受。聖聖，囡仔ㄧ踏出門口，就隨問我：「啥物時陣會使閣來？
」