真歡喜進前咱《台語鹿的台語路》佇公視眯電影活動提著好成績，咱來看製作人佮咱分享幕後的心路歷程～
文/A-ian (台語路親子樂團團長)
八月初左右，我看著公視台語台微電影的比賽，因為有兩冬前「阿爸的酒杯」著等的經驗，我隨敲予Phín-him，問伊閣合作一擺的意願，可能是予獎金吸引，嘛有可能是想著這齣微電影，對阮紲落來欲發行的「囡仔冊＋囡仔歌專輯」會當有寡宣傳效果，也有可能阮兩个根本無意識著這層代誌的困難度，橫直無加開偌濟時間溝通，就決定欲參加這个比賽矣！
然後，我就去「台語路親子樂團」的群組裡徵求劇本，過無偌久，Bí-huâ就生出一个故事唸予逐家聽，故事本身小可驚人，毋過嘛蓋會當反應社會的現狀，逐家攏感覺是一个誠厲害閣蓋有意思的故事！
有故事了後，閣開一兩禮拜調整跤本， 就請Vivi開始配音矣，我負責處理配樂、音效、剪輯，印象中聲音檔案初剪予Phín-him的時陣，離截止日已經賰無一個月矣…
紲落來上辛苦的就是Phín-him囉，大身大命，閣愛拚勢一張圖一張圖創作，然後才按照錄好的音檔，共圖的順序排予正確，共影像的長度對予準，了後閣愛針對我龜毛的想法來調整…就按呢來來回回幾若擺，總算佇截止日期進前完成這齣微電影！(結果交件了才發現截止日期竟然有延期…害阮趕甲欲死…)
本身無任何影像相關背景的我，會使和逐家做伙完成這項作品，有影感覺誠榮幸。愛感謝的人足濟，除了無計成本代價鬥陣拍拚的台語路團隊戰友，Bí-huâ、Phín-him、Li̍k-hiân佮所有大力相伨的台語家庭，閣有Sió-li̍k佮伊其他專業的朋友，當然閣有Vivi以及阮兜厝內人的支持，閣有所有捌予我攪擾，毋管自願抑是非自願幫阮揤讚分享的老師、同學、朋友…等。「台語鹿的台語路-鹿仔有幾隻？」就佇評審以及逐家支持相伨之下，提著今年的「台語特優獎」佮「觀眾票選獎」！
上尾，嘛愛再一次感謝公視台語台舉辦這个比賽，推廣台語。頒獎典禮了後，陳郁秀董事長佮呂東熹台長，以及其他台語台的同伴，予阮的鼓勵也非常溫暖，感謝恁一直以來持續努力和拍拚！感恩，勞力！