台語班（學校）一步一步向前行
文: Bí-hôa
台語班（學校）一步一步向前行。
今仔日（20220623）真感謝 苗博雅 MiaoPoya 議員幫阮佮台北市教育局開協調會，予教育局閣較了解阮台語家庭的需求。
今仔日的協調會， 王閔生 台北市議員、 林亮君議員佮 黃郁芬 台北市議員 的主任攏有來參加，提供寶貴的意見。
阮的重點，是希望本土語言的囡仔攏有機會用家己的語言受教育，欲做到遮，著愛有相關的法規、師資佮資源來鬥相共。
佇會議頂懸，苗議員針對現有的辦法，請教育局提供予阮，看會當按怎予阮的囡仔佇學校有閣較濟母語資源。
中長期來講，嘛請教育局去揣願意做台英實驗學校的小學、閣有統計學生對台語班的需求。
阮有台語阿母講tio̍h這馬有的學校老師佮大人較欠缺母語意識，致使家長欲佇講台語嘛hông反對，欲請老師申請台語浸水式教學，老師煞講袂當限制佇台語，按呢對其他的族群無公平。
阮想欲講ê是，佇紐西蘭連醫療人員攏tio̍h上3點鐘的語言平權課，按呢醫療人員才袂共毛利人的名唸毋著，咱台灣有遐濟本土語言，嘛應該愛予每一个老師佮公務人員上這款的語言平權課才tio̍h，毋是講愛尊重所有的族群，著愛逐家干焦會當講華語，這才是無尊重族群的做法。
這chân代誌，了後嘛會囥佇阮需要向教育局追蹤的項目。
台北市的協調會先開，其他的縣市嘛有台語阿母咧做伙推捒ah，過去，錯誤的國語政策，致使台灣的教育語言一直限制佇華語（國語），這馬有國家語言發展法了後，國家語言攏會當來做教育語言，只是國家大部份的資源猶是囥佇華語無tio̍h英語，咱tio̍h愛拍破這个限制，我相信這是做會到ê。
台語囡仔的路，咱做伙來拚！