派出所參觀訪問，台語嘛會通！

文：Angel（台語路共學團員）

捌（bat）佇街仔路聽著大人kā囡仔講：你若無乖，就叫警察來掠（lia̍h）你！

警察敢有影專門咧掠囡仔？阮佮警察分局聯絡時間了後，就𤆬（tshuā）台語路共學ê囡仔做伙去派出所參觀拜訪，欲來去化解一寡人對警察ê誤會。

真感謝接待阮ê兩位警察通用台語來導覽，先紹介警察定定咧用ê裝備：無線電（bô-sùann-tiān）、警察棍仔、指揮棍仔、手銬（tshiú-khàu）、盾牌（tún-pâi）、帽仔、頭盔、防彈䘥仔（kah-á）……等等。囡仔頭一擺會當遐呢近看著遮ê物件，猶閣會當提佇手內、戴佇頭殼頂面、穿佇身軀外口，誠是難得ê體驗。

紲落來，予逐家看宣傳影片，嘛是台語–ê呢！內容是家庭暴力、詐騙、袂當烏白食生份人ê物件，適合規家伙仔做伙看。猶閣𤆬阮去看掠到歹人了後，共歹人ê手佮腳攏銬牢ê所在。

過程中，囡仔一直問警察問題：警察棍仔是按怎會變長？敢是用指揮棍子指揮交通？歹人敢連鞭（liâm-mi）就會來？警察攏親切來回答問題。

落尾，予囡仔坐警察用的大型重型機車、警車，逐家做伙佮警察翕相。

感謝兩位警察：喻禮民、黃登國，專業ê導覽解說，對囡仔真友善。

所以，警察毋是用來恐嚇囡仔無乖ê時陣會予掠走–ê，顛倒是有困難的時陣會當揣來鬥相共–ê。

❤️ 特別感謝 #中和警好讚