文：茄苳（台語路–大人囡仔共學團團員）
編按：茄苳是臺灣阿德勒心理學會認證的「親師諮詢師」 和 「讀書會帶領人」，tī線頂開讀冊會，kah台語家長討論教養問題。
昨暗ê台語阿德勒讀冊會，聽著一个故事，想欲佇遮共記錄–起來。
阮彼時講著李崇建老師捌佇冊內底講著ê概念：家庭內底「文化、規則、應對」對一个人ê影響。
「文化」，就是一口灶日常ê生活，按怎食、按怎穿，攏算在內(厝內底ê大人–爸母就是徛咧一个𤆬頭ê角色)。
比如講，切一粒檨仔（suāinn-á），有ê家庭是共檨仔破開(phuà-khui)，割做一格一格，食ê人家己那剝皮那食；有ê家庭是皮攏剝好、切好一細塊仔一細塊，閣攢攕仔（tshiám-á）、碟仔(tih-á)，一手攕檨仔、一手用碟仔承（sîn）滴落來ê汁按呢食。
(若有人欲問：「佗一種文化較好?」 其實講起來是有好有䆀，頭一種家庭大漢ê囡仔有機會家己剝皮、第二種家庭大漢ê囡仔會學著食物件ê幼秀款，你講著–無?)
「規則」是講明ê，愛逐家攏照咧做–ê。每一个家庭有無仝款ê規矩。關鍵ê所在佇咧：這口灶ê規矩，是按怎定–出來ê?
是其中一个人發佈ê命令、其中兩个人參詳ê結果，抑是所有ê人攏了解、認同了後才來執行ê? 無仝ê做法，咱會當看著這家伙仔內部ê動力關係。
「應對」講ê是當當欲執行規則ê時陣，會按怎提醒對方? 講啥物話?有啥物款ê情緒?比如講，時間到–矣，大人欲叫囡仔去洗浴，會用啥物口氣對伊講? 會講啥物話? 這類ê，就是「應對姿態」。
「文化」對一个人過生活ê方式影響誠深。若是看著摻家己ê文化較sio-siâng ê情景，就真有可能會觸著(tshiok–tio̍h)伊心內ê情感。是啥物款ê情感咧?甜蜜?懷念?悲傷?驚惶?憤慨? 遮ê情感是按怎來ê? 和伊家己主觀ê想法，閣有長久以來厝內底ê「規則」、「應對」有真大ê關係。
講到遮，有一位媽媽L講起in兜囡仔拄著ê問題。
L講伊ê囡仔對比較較頇顢(han-bān) ê代誌會毋願做，愛共伊講足久才會振動一下。
像講in囡仔無興做手工，愈少做就愈做袂來。鉸刀攑了無好勢，就無愛鉸物件。
過一陣仔in囡仔愛去幼稚園–矣，足煩惱囡仔會佇學校綴袂著老師；別人若攏替伊做，伊就會閣愈袂曉。
我共問講，囡仔敢有「發展慢鈍(bān-tūn)」ê問題? L講，囡仔佇咧伊興做ê代誌方面攏表現了誠好。鉸物件應該是愛較捷練習就會使–矣。
對遮，我知影毋是囡仔發展ê問題，真有可能是囡仔ê心肝內卡牢–矣。
我知影L是一位誠認真咧過生活ê人，嘛佮意學習新ê物件。
我問伊：「咱咧學習ê時陣，到一个坎站(khám-tsām)就會『撞著壁』，愛足有耐心才堅持會落去。你攏是按怎予家己堅持落去–ê?」
L想想咧，講：「學習是有辛苦ê所在，毋過若忍(lún)會過，後壁就會愈來愈順，閣會感覺誠趣味。」
我講：「這是誠好的體悟，你敢是想欲共按呢ê學習心得，教予囡仔了解? 毋知你敢猶會記得你家己是啥物時陣有這个體悟–ê?」
L講：「嗯…我袂記得–矣呢。」
我閣共問：「敢是佇幼稚園進前?」
L聽了起愛笑，講：「哈哈，應該無啥可能。」
我講：「#你想欲教予囡仔ê代誌是一份足媠ê禮物。毋過，目前看起來囡仔猶未準備好欲收這个禮物，是毋是按呢?#若準講伊猶未欲收，#你按算欲按怎做?」
L想一下，應講：「我…會等伊。」
我：「你會等伊?」
L講：「著。」
我講：「『#等待』嘛是一份誠好ê禮物–喔。」
L講：「我想著–矣，伊這站仔有一件代誌予我料想袂到。伊進前無啥會曉鬥圖，有一工我咧用手機仔，一下越頭，煞看著伊共一个鬥圖攏鬥好–矣！我掣一趒（tshuah-tsi̍t-tiô）！」
我問L：「這件代誌咱大人攏無插手(tshap-tshiú)?」
L講：「著啊！」
我講：「#毋知伊是經過啥物款ê路途來到遮ê?」
L講：「著呢…」
我講：「有時，咱若願意『等待』就會當予囡仔有時間和空間去行伊ê路。你看著囡仔較頇顢使用鉸刀，你會攢較濟物件欲予伊練習，這是真好ê代誌。咱會當攢佇遐，囡仔有可能來鉸一、二下仔，就閣走去。無要緊，物件猶是佇遐。伊過一睏仔，閣會來。凡勢有一工，咱會看著伊竟然佇遐鉸規半晡?無，咱就試看覓?」
L：「好！」
L身上有真好的「文化」予囡仔，這个文化就是「有堅心面對學習」。毋過囡仔會按怎看這个文化，是壓力，抑是想欲試?和咱佮伊ê互動足有關係。
我看著L誠想欲共這个好ê觀念教予囡仔，干焦講，對囡仔ê反應看起來，大人ê跤步會當閣放較慢咧。
欲按怎予大人會當放輕鬆，共跤步放慢咧?予伊看著另外一个嘛真有價值ê代誌：等待。
L佇咧過程想起「鬥圖」這个例，加強家己的信心。
我鼓勵L會當佇後擺讀冊會進前試看覓「等待」，看有啥物無仝款ê發展。
育囝若親像一个未知ê旅程，咱攏是那行那看那學。有向望，就會有氣力繼續向前行。