親子創作繪本介紹《鬥陣來𨑨迌》

《鬥陣來𨑨迌》
最近咱有台灣話家庭ê囡仔kah阿母家己出版一本繪本喔!
這本繪本是咧講啥物?
是啥物緣故予in想欲來出版這本冊咧?
做伙來看覓!

文/ 陳芸瑛

📚《鬥陣來𨑨迌》作品簡介:

有一個查某囡仔號做阿真,
伊今年8歲,蹛佇桃園。
伊上愛旅行,四界去𨑨迌。
伊大漢想欲做導遊,
紹介咱台灣予逐家知影伊ê súi。
伊熟似足濟外國朋友–ê。
有一工,
伊邀請外國朋友來台灣𨑨迌,
伊𤆬in四界去耍,
看風景、食好食的料理,
體驗台灣的活力、浪漫佮熱情。

💡創作ê機緣

創作繪本是因為2021/10/10我去參加統域的一個課程,有一擺討論是逐家攏講看覓家己上想欲做的代誌。

我講我想欲學台文,真濟人真意外,in毋知影台語有字。

我講我kap囡仔講台語、想欲將母語揣轉來的代誌,閣講著阮看著《摃槌仔龍揣媽媽》的尪仔冊,阮查某囝講伊mā愛畫圖,伊mā會曉畫,佇我心內想過,假使有機會阮來畫一本冊做紀念。

這個想法講出嘴,逐家攏鼓勵我去做出來,kap冊印刷出來參加義賣推廣台語,in來鬥相共。

就按呢,我kap囡仔討論,問看伊有想欲畫尪仔冊無?

文綺講好,伊真有想法,阮mā有揣伊的美術老師鬥相共指導,老師mā真支持。

我將欲推廣台語的想法講予文綺聽,伊想著去台灣國二冥三工歇熱營,閣有kap阿公阿媽去環島旅行,伊講伊欲畫環島的故事,紹介咱台灣予逐家知影。

為著會使佇12/26參加朋友辦的義賣活動阮有物件義賣,阮只有100工,想故事主題、大綱內容定好,看相片、網路頂懸揣資料予文綺看,伊家己決定伊欲畫的圖,等伊畫好,我才閣想看覓文字按怎寫較好,伊畫的圖真有想像力、創作的畫面阮攏真佮意。

過程mā是有困難,囡仔有功課、考試、伊mā想欲去𨑨迌、看電視,阮就沓沓仔來,陪伊一工抑是一禮拜畫一寡仔,伊逐禮拜一工去老師教室畫2點鐘,鉛筆草稿真緊就畫好矣,漆色較麻煩,用色鉛筆,愛畫幾落擺,老師講愛用真濟種色水,才有法度掃描、印刷,看著作品完成,真正足有成就ê,真感動。

朋友介紹的印刷公司的頭家人真好,幫阮趕時間印刷出來予阮參加義賣,因為有朋友看無,建議愛有聲音較好,本來想欲kap囡仔鬥陣唸,毋閣伊會歹勢,我就無勉強伊,我家己錄音。

創作的過程,我kap文綺討論、想辦法解決問題、陪伴伊畫圖,真正是真特別的紀念、難忘的回憶!

希望會使予閣較濟人知影這個繪本,所以進前有辦發表會,閣請朋友幫我佇面冊直播,真正足特別的體驗。

阮真感謝訂冊的朋友,願意閣等我加上QR code印出,mā真感謝捐錢送冊的朋友,感謝恁的愛心kap支持,阮會kā冊送出去,mā希望有機會四界去講古予逐家聽。

✏️作者:陳芸瑛tân ûn eng
雲林台西大漢,全台語,6歲開始蹛佇三重埔,讀冊攏是講華語。是台北榮總護理師,有3個囡仔。
受著逐位前輩的影響,感受著台語保存的重要性,想欲創造台語環境予囡仔。
母語是一種感情的連結,文化的傳承。
想欲用故事陪伴囡仔大漢,想欲用故事推廣台語。

🖌繪圖者:廖文綺liāu bûn khí
生日:102/01/07
蹛佇桃園龜山,大崗國小3年仔
上愛畫圖、看尪仔冊
上愛去𨑨迌、上愛台灣
希望逐家佮我講台語,
咱做伙講台語☀️