文：T編ê
阮兜4歲半ê囡仔去幼稚園三工，轉來開始大量濫咧講佇學校學著ê華語詞，我用台語閣讀一遍，愛伊綴念，頭仔幾擺伊攏激恬恬無願意，紲落來就講伊無愛講台語矣，伊這馬想欲學華語。
（補充：伊是無愛綴我念我ka改的台語詞，毋是欲完全干焦講華語，無愛講台語）
我就無閣用按呢直接ê方式tiau伊ê華語詞，我問伊是毋是學校ê人攏講華語，閣你這馬嘛想欲學華語、感覺家己變閣較厲害？伊講是。
我就改用𨑨迌搶答ê方式，予伊佮6歲ê姊姊耍台語華語詞ê對譯，早前就捌耍過，閣in有看台語台全家有智慧，對這種搶答比賽ê情境真熟似嘛真有趣味。
自按呢便若聽著in puh華語詞出來，我就隨時講「請問！」，in就liâm-mi知影我欲創啥，閣會問我是按怎雄雄欲耍。
這馬弟弟已經袂閣聽著我欲tiau伊ê華語詞就喙合咧毋tshap我，袂講伊無愛講台語，嘛袂排斥我「糾正」伊的華語，顛倒不時主動佮我閣有姊姊喝耍某乜物件台語華語按怎講，兩个攏相爭攑手，阮閣會講這馬欲出較困難的詞喔！囡仔若會曉，就大大共in呵咾。
總–是，佮囡仔全台語遮濟年，這款「我想欲講華語」「是按怎咱講台語」的問題當然已經毋是頭一擺，嘛經過各種的討論，爸母愛真激頭腦，政治、歷史的因素予人強迫講華語，台灣人的爸母煞tsua̋n袂記得欲佮囡仔講台語等等，到入學校，因為無台語學校，才著予in去「無人咧講台語」的所在受教育。
希望予in會當了解堅持，我無才調改變in愛行入去的大環境，上無咱踮厝裡，一定愛維持講咱的話。
***
凡勢有人會講：「透濫寡華語詞那有要緊？你按呢敢袂傷偏、『矯枉過正』！」
我會用共你講，這我已經真有經驗！
你若感覺透濫一下無要緊，華語的新詞實在比台語太濟囉！終其尾，佇你無智覺的中間，囡仔的講話就會對透濫5%、10%，變做100%的華語去矣。