毋知逐家最近敢有注意著，
你身軀邊凡勢有一種樹仔ê花開了當茂（ōm/ām）當suí？
一簇一簇、淺淺ê茄花色，這就是苦楝仔樹。
有朋友共編ê講，伊最近才熟似這款樹仔。
這位朋友嘛是這幾年因為欲佮囡仔講台語，才沓沓仔共家己ê爸母話抾倒轉來。
毋知逐家敢嘛有這款感受？
我感覺佇這條走揣母語ê路裡，
會予咱對身軀邊ê事事項項加真要意，
會予咱想欲共頭殼內佮性命中所欠缺ê所在補起來，
真自然會閣較想欲知影，
咱目睭所看著ê物件，若欲愛用咱ê話來稱呼，伊會號做啥物名？
看著一欉開花ê樹仔，
佇你ê心肝底會puh出啥物詩句？
咱台灣ê詩人莊柏林先生，捌寫過一首關係苦楝真有名ê詩，
後擺若看著苦楝仔開花，你敢嘛會想著這首詩？
《苦楝若開花》/ 莊柏林
苦楝若開花 就會出雙葉
苦楝若開花 就會出香味
紫色的花蕊 隨風搖隨雨落
苦楝若開花 就會春天來
苦楝若開花 就會結成籽
紫色的花蕊 隨風搖隨雨落
田嬰停佇厝邊角 白頭殼樹頂做巢
一陣囝仔佇樹腳 掠蟋蟀仔佇相咬