文/醫龍（拜二共學團團員）
恁敢知影恁食的飯是對佗位來ê？佇台灣，有一陣人為了維護生態，保護食食(tsia̍h-sı̍t)安全，堅持毋濺(tsuānn)藥仔、用化學肥料，無毒的環境紲唌足濟鳥鼠(niáu-tshí)來農田，咬歹作物，閣挖歹田岸，予田水流了了，對農民嘛造成損失。
雖罔講用鳥鼠藥來毒(thāu)俗閣緊，毋過按呢會無細膩毒著食鳥鼠的猛禽，就是鷹仔和貓頭鳥。其實猛禽本底就是 #天然的鳥鼠張(niáu-tshí-tng)，若是有法度用 #生物防治，予猛禽來鬥相共掠鳥鼠，對環境更佳友善。
原本佇金門才有的烏箭翎，十規年前佇台灣本島hőng發現。這種鷹仔一工tha̋ng食兩隻鳥鼠，一對烏箭翎一年就掠上千隻！in佮意徛佇咧懸懸、突出的所在，所以研究人員就佇田裡底tshāi一支六到九公尺的竹篙，唌烏箭翎來徛，順徙鬥掠鳥鼠。
這个方法確實有效，佇台中霧峰的香米田區，就發展出「#烏箭翎米」，毋但農民有米thang賣，民眾有無毒的米thang食，烏箭翎嘛袂食著中毒的貓鼠閣綴咧中毒。真實是一兼二顧，摸蜊仔兼洗褲！顧腹肚閣顧生態啊！
這擺佇牽囡仔ê手 行台語ê路 #拜二共學團，阮共囡仔紹介這種會鬥顧田園的鷹仔，讀《#黑翅鳶尋家記》這本畫本，落尾予逐家做一隻會使停佇手指頭平衡的烏箭翎，閣食用烏箭翎顧田的米做的飯丸，真正是一个有智識、有食閣有掠的活動！
向望囡仔會記得這種疼惜自然的心意。
台華對照詞
烏箭翎：黑翅鳶食食：飲食鳥鼠：老鼠鳥鼠張：捕鼠器
野塾