由總統府台語導覽看社會對台語觀點變遷
文：Le̍k-hiân
頂禮拜，台語路共學團相招去總統府參觀，結果人數傷濟，大人囡仔攏總成百个，閣拆做兩工分開去。
感謝團員有人熱心安排chih-chiap、有人積極聯絡公視台語台來採訪，落尾毋若是逐家入去耍一chōa，閣透過媒體表達「#台語導覽」ê需求kah必要，希望未來毋管是博物館、美術館抑是民間機構，攏會使注意著本土語言ê使用需求，提供本土語言ê導覽kah資源。（公視台語台報導連結）
其實阮三冬前就bat申請過總統府ê台語導覽，彼擺ê老師蓋專業，毋過隔壁其他導覽員行經過看著阮這團，足意外問講「 #啊那ē攏是囡仔？」意思是，台語應該是講予老人聽–ê？閣有導覽員好玄來問：「 #恁敢是新住民？」可見逐家完全無法度想像台灣囡仔講台語這層代誌。
今年閣去，這種情形就改善誠濟，導覽團隊攏真有準備，連總統府內底其他工作人員、憲兵kah阮講話ê時陣嘛會自動切做台語，看–起來這馬逐家有較適應「囡仔講台語」–ah！無閣出現三冬前彼寡真譀ê關心
有按呢ê進步阮這陣人ê功勞應該袂小
所以chhōa台語囡仔行出去（hō͘人看）有影足重要，袂輸是咧做社會教育！
這項事工m̄-nā台語路ê爸母會當做，mā向望koh khah濟人徛出來，hō͘台灣恢復多語言ê社會環境，m̄管tī啥物所在聽著台灣ê本土語言，攏應該真自然koh自在–ê。