10月10號，咱台灣人慶祝霜食節啦！
文：Le̍k-hiân／圖：Pe̍k-him
台語大露營今仔日提早慶祝霜食節
起鼓唱「食冰歌」kā人箍倚–來！唱煞先開講五分鐘，問逐家敢知影今仔日是幾月幾號？
「十月八號～」
是按怎咱這擺會當來遮露營四工？
「因為是雙十節(siang-sı̍p-cheh)。」有人講。
兩工了後十月十號就是中華民國ê雙十節，這工逐家會看著足濟中華民國ê國旗插kah規四界，恁敢知影彼旗生做啥款，有啥物色？
「紅色、藍色、白色！」較大漢ê攏知！
是按怎有這个雙十節咧，這就愛講著1911年， 112年前ê故事。112年前，台灣隔壁有一个足大ê國家，彼是啥物國？
「中國！」哈，毋是呢！
彼當陣台灣ê隔壁是清國。啊彼陣ê台灣咧？
「日本國！」逐家有概念，台灣彼陣仔是日本政府統治。
毋過佇112年前ê 10月10號這工，清國發生一場戰爭，戰爭結束了後清國hō͘拍敗–ah，後來hō͘中華民國取代，自按呢中華民國就kā 10月10號這工當作家己ê生日。
若按呢，彼當陣台灣人敢知影隔壁國咧戰爭？
「毋知！」囡仔臆。
彼工毋知，毋過隔轉工看報紙就知–ah，報紙有報，講清國發生戰爭（*遮應該講「暴動」較著），台灣人看報紙才知：哦～可憐哦，死足濟人，抑毋過⋯足遠ê代誌，kah阮無啥物關係呢⋯
若按呢，112年進前10月10號彼陣ê台灣人咧創啥？咧食冰！
古早時代敢有冰箱？敢有冰通食？無呢，一直到112進前，才拄仔發展出製冰ê技術，台灣開始興食冰。
所以，10月10號，中華民國慶祝生日，毋過咱台灣人，會當來慶祝食冰啦，若一定愛講「雙十節」就講做「霜食節 sng-sı̍t-cheh」好–ah 
來食冰喔！
感謝 對囡仔講台語-台中台語囡仔伴 招露營！