台語家庭ê「早療復健」及台語友善早療院所名單推薦

27 12 月, 2023

台語家庭經驗, 台語路專題 Becky 0 Comments

圖、文_Ún-hing

行復健的路

佇阮兜囡仔學行路ê時，一寡親情朋友共我講，恁查某囝行路草鍥仔跤（内八），是毋是因為尿苴仔包傷大包才按呢？我心内想哪有可能包尿苴仔會草鍥仔跤，按呢全台灣超過半數ê大人毋著攏草鍥仔跤過。傷濟人一直佮我唸囡仔跤斡入（内八），我只好佇徛家附近新莊新仁病院做物理治療。因為囡仔傷細漢，治療師安排伊單獨上課，家長踮邊仔陪，老師嘛講台語共阮查某囝上課。

阮查某囝欲兩歲的時，行佇路咧有一个阿婆共我講一定愛𤆬（tshuā）去予醫生看，阮查某囝行路ê形佮伊查某孫仝款。然後阮去幾若間病院看復健科，落尾佇台北醫學病院遐ê物理復健師建議阮去照電光確定是跤頭趺抑是尻川骨（髖關節）的問題，電光照落才知影毋是干焦看復健科就會使，閣愛看小兒骨科，後來確定是囡仔ê尻川骨淡薄仔走精去。

台大醫生建議予囡仔一寡仔時間看覓，無的確骨頭繼續生長，尻川骨的位可能會家己改善抑是好去，半年外ê觀察期阮就安排囡仔運動佮復健。知影跤斡入ê原因，阮佇新仁病院ê物理治療就有調整訓練的項目。觀察期過了後，阮落尾決定欲予囡仔手術，嘛欲佇台大病院做復健。台大安排復健需要做評估，想講攏欲做評估矣，規氣綜合評估攏做，包含物理、職能、語言、心理、社工。

華語佮台語評估，準抑是無準？

頭起先愛舞清楚阮兜囡仔跤斡入ê狀況，揣幾若間復健科看，囡仔才兩歲爾爾，完全聽無華語，毋過少年ê治療師大部份攏袂曉台語。見擺一開始攏講囡仔入去，家長毋免入去看，落尾攏出來請媽媽入去。治療師干焦會曉提tshit-thô-mih-á（玩具）唌囡仔，抑是先做予囡仔看，予囡仔模仿治療師做一寡動作，若準in愛囡仔配合倒咧塗跤予人觀察、撨（tshiâu）跤腿就真困難矣。袂曉台語，就無法度安搭阮兜ê囡仔、無法度共伊講愛做啥物代誌。

因為有遮的經驗，欲安排台大做綜合評估ê時，就有拜託醫生愛註明阮欲注文會曉講台語ê治療師。毋過，落尾干焦幾項仔評估有治療師會曉講台語。佇台大評估，我攏有佮囡仔做伙佇教室內底。頭一項是職能治療，治療老師因為有𤆬（tshuā）實習生，所以伊是台語佮華語透濫，請囡仔配合做一寡代誌，阮兜囡仔是欲做閣敢若毋做。第二項拄著台語講甲真好的語言治療師，囡仔佇内底耍甲毋愛出來，硬𤆬（tshuā）出來閣問敢會使閣來？第三改拄著無遐會曉台語的物理治療師，囡仔就無愛振動無反應，我愛一直翻譯一直姑情，請伊做予老師看。三改完全無仝款的經驗，我開始煩惱心理評估矣，因為老師講伊完全袂曉講，愛我自頭到尾翻譯，評估過程阿母我足痛苦，老師講一句我翻譯一句，翻譯解釋傷濟傷少攏袂使，囡仔應該是感覺阮遮的大人真奇怪，一直講話講袂煞，一下仔就忝–ah。社工評估主要是社工佮家長講話，偷偷仔觀察佇邊仔耍ê囡仔。

我誠實向望會當有台語版ê心理測量量表，有會曉講台語ê治療師。阮的囡仔參與評估ê時，心情無法度輕鬆、無想欲配合，按呢遮ê評估做出來到底有準抑無？

台語友善物理復健課佮華語物理復健課

阮兜囡仔ê物理復健課頭起先佇新仁病院，個人上課時物理治療師是用台語佮囡仔解說，請假開刀了後，上課的人傷濟，一直排袂入去。等到有機會安排上課ê時，干焦會當上團體課矣，好佳哉老師解說是華語講一改、台語講一改，予阮兜囡仔嘛會當聽有，知影老師愛in做啥物。

佇台大上物理復健課半冬，阮查某囝佮講華語ê物理復健老師就是袂親，一禮拜一擺，見擺拄著老師就敢若是頭擺見面，後來物理復健師評估阮免閣上伊的課–ah，我嘛無閣排台大復健科門診矣，想欲拍拚共囡仔揣台語ê物理復健。

現此時阮佇輔大診所做物理復健治療，老師真拍拚講台語，雖然淡薄仔khê khê（卡卡），囡仔伊聽有心情就真好，會配合老師講的，嘛會認真做。

華語「漸進式」ê職能治療佮台語職能治療比較

通常物理佮職能的復健治療做伙安排上課，職能治療嘛會做大動作ê練習，阮兜囡仔佇新仁病院ê職能老師是講華語ê，老師知影阮的囡仔講台語，毋過老師無信心用台語上課，而且囡仔才拄開刀煞，所以安排阮兜囡仔一个人單獨上課，培養感情，沓沓仔用華語講，阮兜囡仔用台語應。自費上個人課真簡單，公費補助個人課機會足少–ah，真正足感心矣。差不多過半冬，老師感覺囡仔信任伊，華語嘛聽較有矣，會當上團體課做別項練習，才改去佮其他華語囡仔做伙上課。

囡仔ê阿爸感覺囡仔較無法度好好坐咧專心食飯、畫圖，希望職能課的老師會當鬥相共加強練習。我足想欲替囡仔另外揣台語職能治療師。我佇網路揣著輔大病院有「早療中心」，敲電話去問，in建議我去輔大診所問，因為輔大病院治療師會曉台語袂曉台語in毋知，另外是排隊掛號愛等足久才有機會掛著號。

運氣真好，輔大診所ê職能治療師，台語好嘛願意用台語上課；物理治療師台語雖然袂輾轉，猶毋過願意用台語試看覓。我就按呢順利揣著台語職能和物理治療的復健師。

是按怎已經有上華語ê職能治療課，就會使請老師觀察囡仔專心度ê問題，我哪會閣欲揣其他ê老師？因為華語職能治療師感覺阮兜囡仔上課足專心，無阮翁煩惱ê問題。結果，囡仔上台語ê職能治療，連鞭佮老師就敢若「麻吉」仝款，上課心情輕鬆，老師隨發現囡仔阿爸講ê問題。華語團體職能課，阮查某囝愛百分之百專心去聽老師佇咧講啥，有興趣、無興趣、學著啥物對囡仔本人已經毋是重點矣，因為精神攏開佇聽有華語這件代誌頂面，莫怪逐擺下課ê時攏忝甲隨欲轉去厝裡歇睏。

樂暢閣心適ê語言治療

佇台大病院做語言評估的經驗佮結果傷好，阮攏無啥煩惱阮兜囡仔有啥物語言方面ê問題。毋過佇囡仔愈大漢，就愈濟人共我講囡仔鼻仔音足重，敢若歌星蔡秋鳳，可能愛小可仔注意敢若有聲音ê問題；嘛有人感覺彼是臭奶呆，嘛有人講講話話句傷短才是愛注意矣。看過耳鼻喉科確定無身體上的問題了後。就開始揣會曉台語ê語言治療師，毋過無法度指定以前台大彼ê語言治療師，誠可惜。

有真濟語言治療師直接拒絕用台語上課，理由攏是袂曉講台語、台語講袂輾轉、台語佇學校無路用，華語較重要；「早療」面冊社團有人留話講伊有特殊教育老師ê背景，伊認為干焦用一種語言–華語，囡仔咧學較緊；有人講愛自費治療才有可能揣著治療師，毋過，若是愛自費，治療師會曉台羅我才有法度接受；嘛有治療師講欲替我留資料佇語言治療師的手機仔大群組，問看敢有人有興趣接案，結果無人回。

語言治療師無徛佇台語家庭ê立場去思考，干焦想著中華民國ê教育體制，想欲救阮囡仔ê華語能力。我共遮ê治療師講甲足明矣，我希望用囡仔感覺安心四序ê語言上課，毋過治療師敢若攏聽無。聽講講英語ê外國人佇台灣揣會著講英文的治療師，是按怎台語家庭佇台灣欲揣講台語的治療師顛倒是遮爾仔困難？揣無台語語言治療師，已經是無步矣。

有一工我凊彩行入去一間復健診所問語言治療師有佇無？敢會使了解清楚了後，才掛號請醫生開復健單。好佳哉語言治療師有閒會當佮我講話，頭起先伊嘛是講伊台語無夠好，應該是無法度用台語上課。櫃台小姐共我問為啥物我堅持愛用台語上課，我講我是台灣人，我無想欲做中華民國人，逐家理解就笑矣。我共in講，用台語共囡仔上課，是欲予伊感覺自在，治療效果才會好，中華民國學校用啥物語言教書對阮無重要。落尾治療師講台語無親像華語、英語、日語有足濟符合認知發展ê「螺旋式」教材，而且伊袂曉台羅，所以無法度撨（tshiâu）發音ê問題，毋過除了發音，其他ê攏會使用台語來教阮兜囡仔。治療師現場看囡仔講話「軟腭」會曉關，鼻音應該無啥物要緊，會當專心來改善其他的語言能力，阮就按呢揣著台語ê語言治療師–ah。

治療師替阮揣著願意予囡仔用台語做伙上課ê伴，老師一句台語一句華語講予兩个囡仔聽。頭一擺上課阿姊共阮兜囡仔褒甲欲飛上天，伊講：你是我熟似ê人内底，台語上蓋好ê人，比所有ê大人閣較好，這馬阮查某囝去上語言課攏會講今仔日是欲去共阿姊、蔡老師鬥相共做台語小老師ê日子。

希望阮兜ê經驗，予需要「早療復健」協助ê台語家庭會當有閣較濟ê信心，揣著台語ê復健課是真正有可能矣。祝福逐家順利！

【感謝李恒德老師、阿媽林鈺靖協助台文用字和厝邊阿祖分享伊ê老台語】