文/圖：Bí-Hôa
咱敢有法度用台語講科學hō͘囡仔學智識？佇一寡人閣咧思考這个問題的時陣，已經有4本講再生能源kah地熱資源的囡仔有聲冊出版ah，就是前衛出版社出的《 #熊星人希堤星系迷航記》佮《 #熊星人蓋亞能源遺跡之謎》，這4本攏是用3隻太空熊做主角來結合科學知識。好佳哉有這款冊出版，較早若是拄著有人咧剾洗講台語敢有法度講智識，我就愛提出100年前的台語護理專業冊來證明台語嘛是會當講智識的，只是彼已經是100年前ah，ah這馬咧？這馬有古錐的《熊星人》來做頭名，這是台灣第一本科普類的台語智識bàng-kà。
這四本冊的對象主要是國校仔的學生，毋過，阮兜的6歲囡仔嘛是真愛那看冊那聽音檔，我相信伊對內面的智識毋是完全聽有，是有聲音檔錄佮真趣味，冊嘛畫kah真古錐，才予伊願意一本一本看落去。對台語囡仔來講，𪜶袂思考台語敢有法度講科學這个問題，𪜶想的是：閣來咧？主角敢會有危險？
其實《熊星人》 佇公視有出華語的bàng-kà影片，這馬閣用台語來出冊，誠有心想欲做到予無仝語言的囡仔攏來學著科學智識，既然是台語、華語攏有，按呢這本冊的重點就毋但是語言，是伊按怎講予囡仔知影無仝的地質科學？這無論是用華語猶是台語攏無簡單，重點是劇情佮圖用佮有好無？
我頭拄仔講我的囡仔愛看，其實頭一擺攏是看心適的。阮後來無代誌嘛會péng冊來看，頭擺了後就毋是照順序，是掀到佗位就看佗位，親像今仔日看第4本，講風是按怎形成的？原來風的流動佮日頭嘛是有關係，日頭炤佇地球會因為炤的程度無仝，產生的溫度嘛會無仝，燒空氣較輕，會走去頂面，形成低氣壓。冷空氣較重，會沉落去，形成高氣壓。無仝氣壓的流動就變成風。遮的文字，若是干焦用文字，我相信囡仔無兩分鐘就走了了，毋過因為閣有配圖，囡仔會當ná看圖ná聽解說，重點是閣有劇情會當予囡仔願意繼續看落去。
看冊的時陣，囡仔就講想欲看真正囥佇海內底的風機，𪜶真好玄欲按怎共風機插佇海懸頂？我揣影片予𪜶看，兩个囡仔攏感覺真特別，就按呢因為看這本冊開始對風機發電有興趣。我相信這4本冊會當看足久的，看到囡仔讀國校ah閣會當提來péng，按呢算來，4本冊做伙買是900箍，又閣是全部彩色的，真正有值得買ne。