文： 李孟真 （台語阿母 台中台語野餐共學召集人）
阮囝chiâⁿ愛聽台北台語路ê「牽囡仔ê手，來聽囡仔古」 podcast
今仔日伊提伊ê手機仔予我，希望我愛聽這集
〈曾端真 阿德勒陪伴咱過有品質ê親子生活〉
我聽完，畫適合我家己ê重點 :
好喙講幾若擺囡仔攏無欲chhap–我，我受氣囡仔才beh chhap–我，其實頭前ê好喙，囡仔早就無咧聽–ah，受氣kan-na予囡仔感覺「阿母咧受氣」niā，袂智覺阿母希望伊做啥。
這種短期有應效ê現象無法度予囡仔真正改變，溫柔堅定ê方法是咱愛改變方法，目標無變，換心境，聽囡仔講，無做評論佮建議，kan-na陪伴就好，時間久長才會有應效。
回想我ê阿爸攏是用這種方式咧陪伴我，毋免踅踅唸，我就對伊身上學著莫講話骨力做ê身影，確實誠有效果。
毋免去學中國抑是外國，原來咱台灣人自底就有這款自古以來陪伴家族ê智慧，佇這个迷失台灣人溫柔文化ê此時，我重新揣著細漢ê家己，希望我嘛會當用阮細漢序大對待阮這陣序細ê心，好好仔陪伴佮疼痛咱每一个囝兒。