文: 茄苳
圖: Suan-san
咱若有法度看著家己ê好，嘛看會著囡仔ê好__台語阿德勒讀冊會紀錄
暗時台語阿德勒讀冊會，一位阿母（S)講著伊ê囡仔為著做惡夢，心情無蓋好。
in大家一下聽著，隨共S講：「一定是妳共囡仔送去讀彼款學校（體制外），囡仔才會佇學校予人欺負、學一寡有ê無ê！人隔壁ê攏嘛送囡仔去讀彼款管較嚴ê學校，注重課業，尾仔考牢台大，按呢才著！」
S聽著大家講ê話，心內誠艱苦，懷疑家己是毋是真正無共囡仔教予好？
雖罔，後來聽囡仔ê老師講，囡仔真正干焦是做惡夢爾爾，無其他ê問題。
毋過，大家按呢評論S對囡仔ê教育毋是頭一擺矣。事實上，大家不時攏會對S踅踅唸，「巧巧ê囡仔，無好好仔栽培哪會使?」
遮ê話，一字一句攏刺對伊ê心肝頭。
我問S，你心內咧艱苦啥呢?
S講：「我驚無共囡仔教予好，予序大人失望。」
我閣共問：「你敢有影是無共囡仔教予好?」
S：「無啊，我誠用心咧陪伴囡仔、了解囡仔ê想法。」
我：「毋過，你敢是嘛煩惱囡仔綴人袂著？」
S：「我感覺重要ê是囡仔會當做伊家己，莫有彼種一定愛符合別人ê期待ê壓力。因為我自細漢就是驚爸母失望，爸母愛我考100分，我就拚命考，為著欲予in歡喜，心內其實壓力足大。我無希望我ê囡仔嘛按呢。」
我：「聽起來你對按呢ê壓力足有感受，你足清楚ê，無想欲囡仔嘛承受按呢ê壓力。目前，你有照你所向望ê方向咧行，敢毋是?是按怎你猶是會艱苦?」
S：「因為…逐擺若阮大家按呢講，我就會受著影響…懷疑家己，煩惱會予序大人失望。毋過，我又閣知影家己所堅持ê教育理念…。橫直，心內是足矛盾ê。」
我：「你自細漢就有『愛聽大人ê話』按呢ê壓力，聽著大人的批評，心內自然會艱苦，我會當了解…」
我紲落去共伊問：「但是，是按怎你無放棄啊? 尤其，你和恁大家官蹛甲遐爾倚，不時攏會聽著in講ê話，心情一定會起起落落…。你敢有想過， #是啥物原因，#你到今猶毋願放棄？」
S想一下，一字一字沓沓講出來：「可能是…#我毋甘囡仔閣受彼款ê苦。」
我：「所以就算你心內有遐濟ê『怪家己』、矛盾，你猶原堅定咧行這條無仝款ê路?」
S：「嗯…」
我：「#你敢有看著你家己有偌爾勇敢? 你對囡仔ê愛，予你勇敢共壓力擋佇門口，為著堅持欲予囡仔無仝ê教育?」
S：「…聽你今仔日按呢講，我才發覺，敢若是按呢！」
終其尾，S對家己ê看法無啥仝矣。伊對家己做ê代誌嘛閣較有信心、閣較確定。
我記錄這篇，毋是想欲主張「讀體制外ê學校才是正確ê」。
每一个家庭、每一个囡仔攏無仝，這無一定標準ê答案。
只是講，逐个爸母為著疼惜囡仔，無論是啥物款ê教育理念，執行起來攏無簡單。
咱若會當看著家己努力ê所在，欣賞家己，鼓勵家己，按呢路行起來會較久長；情緒若平穩，對親子關係、囡仔ê學習，攏誠有幫贊。
咱長久以來的習慣就是批評家己，罵家己做了無好。愈罵會愈無力、愈失志。
若欲看著家己ê好，需要刁工練習，成做新ê習慣，予家己加一種選擇。
#咱若有法度看著家己ê好，#嘛看會著囡仔ê好。