教育,就是台語上大ê希望啊!

#國家語言發展會議#心得
作者:茄苳

今仔日參加「國家語言發展會議」,聽著足濟寶貴ê意見。真歡喜有遮爾濟人關心本土語言ê未來,尤其是文化部願意跳出來做,有影是足感恩–ê。

這八場ê會議,看著濟濟推捒母語ê有志、siăn-pái替逐家講出本土語言ê危機佮向望,心內感覺誠激動。

佳哉有恁,予台灣這个蘊藏豐富文化資產ê社會,有機會共多元語言保存落來,幫贊遮ê語言回歸正常。

印象上蓋深是台中教育大學何信翰教授講,欲鼓勵這馬講華語ê家庭來講台語,若是用「講母語會當連結和厝內ê人ê感情」無一定講會通。

雖罔遮ê家庭ê祖先抑是阿公阿媽是講台語,毋過,現在ê狀況是in厝內「第一語言」已經變做是「華語」–矣,若欲「連結情感」,華語嘛會當啊!(而且可能是「閣較方便」)

有一位曾小姐發言,伊講,凡勢咱著愛拍破「語言來自血緣」這个觀念,變做是為著認同這个文化、認同國家,自主選擇這个語言。我認為按呢講真正足好–ê,無需要去計較啥人才是台語人,只要你有認同台語,就會當選擇台語做你生活主要ê語言來使用。

另外,何教授強調政府愛用「漸進式」,莫一下仔就要求全部ê人愛配合,按呢會予人感覺麻煩、無想欲改變。尤其是心內無排斥本土語言ê人,咱愛一步一步來,一方面台語教材、資源愛累積,欲用著才有通好用,另外一方面慢慢仔用政策、獎勵,才袂予老師、學校、家長感覺壓力傷大。按呢就會當一步一跤印,自然行向語言平等的目標。

這對我來講是足重要ê提醒,愛有才調理解對方ê狀況,才有法度引導、幫助對方克服困難。

現此時會當做ê其實真濟,無論華語家庭敢有可能調整,上無母語家庭ê權利應該愛受著重視佮尊重。「台語學校」是真大ê目標,但是「台語專班」、「台語社團」、「台語營隊」、「台語融入教學」應當是這馬就做會到,而且袂影響傷大ê做法才著。中央、地方,若是制定獎勵辦法、建立教學資源分享平台,相信一定會有效果。

希望會當有一工,關心台語ê gâu人(上蓋好彼个人就是咱ê政府)勇敢徛–出來,創立咱頭一間台語學校,帶動後壁ê台語學校遍地開花。

教育,就是台語上大ê希望啊!(彼當年咱嘛是對教育開始失去台語–ê)

為我和阮囡仔ê母語「台語」祈福。