重看台灣，看重家己
文：吳品瑜 （迷眾來訊投稿）
冬節彼日，德國真寒，強強欲落雪，阮家己撋粿粹，佮三个查某囡作伙挲圓仔。無紅花米就用作雞卵糕的色素代替，無干焦有白色佮紅色的圓仔，閣有青色的抹茶口味。
阮九歲的煞尾仔囝紫晴上愛喫圓仔，伊的台南阿嬤攏笑伊有「圓仔肚」，逐次落飛機轉去厝，一定是人未到聲先到，那行那喝吁：「阿嬤，我欲挲圓仔！」
阿嬤喙笑目笑回答：「戇孫，欲喫圓仔毋較簡單，規年通天攏有咧賣！毋過挲圓仔就愛著時，等到冬節才買有粿粹！」
疫情爆發陣前，拄仔好德國學校放聖誕假期，攏是冬節前一日，所以阮逐冬倒轉去台灣，拄才行李款好，第一層代誌就是挲圓仔。
阮大漢查某囡已經二十二歲，第二的十九歲，𪜶佮煞尾仔小妹那挲那講起過去佇台南過冬節的時陣，一寡仔心適的代誌，攏笑到厝頂強欲掀起來，我上愛踅踅唸，罵𪜶：「三个闊喙婆，較贏一面破大鑼！」。
佇海德堡大學有選修台語文的大漢查某囝，攏隨聽隨學我講俗語，又閣會曉變鬼變怪，那講那用指頭仔將家己的喙弓予闊，姊妹仔笑到袂喘氣。
三个查某囡有講袂完的挲圓仔的故事會當分享，比喻𪜶攏將圓仔挲成manga的尪仔，亦是家己的生相，大漢的相兔、第二的相蛇，攏真簡單挲，毋過小漢的袂曉挲龍，逐次攏氣到𧿳𧿳跳。
上特別的是四冬前，小漢的佮我、阿嬤，又閣有姨婆作伙去赤崁樓參加十八卯、奉茶的頭家葉東泰先生主辦的「冬節吟台詩、唱古謠」挲圓仔會，聽月琴伴奏，葉先生唸台語歌詩，小漢的那聽那挲圓仔，閣會頕頭、用跤拍拍，輕聲綴人烏白唱，袂輸講伊攏聽有台語的款。
彼次真正予小漢的接觸著文雅的台語，尤其是結著冬節挲圓仔的儀式，更加會當幫助伊佇節日佮季節的變化，實際體會台語的韻律。
「阿母，我真幸運有你這个台灣阿母，才會當有無仝款的方式慶祝『日頭阿公』上班上短的這工！阮的同學大部分是純正的德國人，完全毋捌喫過圓仔，嘛袂當挲圓仔，尤其𪜶攏袂曉用漢語講『冬至』，佮用台語講『冬節』，所以講我是上幸運的囝仔啦！多謝你！」
九歲的小漢查某囝竟然嚴肅講出伊的心聲，予我突然真感動，因為平常時叫伊講台語亦是學漢文，伊攏真貧惰，嘛真愛窮分，不時佇遐哼哼叫，講是按怎伊就愛加學台語佮漢語，別人干焦學德語就會使？！這馬伊煞感覺會曉台語佮漢語嘛是袂䆀，尤其倒轉去台南的時陣，佮阿嬤、厝邊講台語，尤其參加各種的活動會當聽有人咧講啥，好比四冬前佇赤崁樓挲圓仔唸歌詩，伊閣會記得彼工的情景。
其實台灣本底就是真濟語言佮多元文化發展的好所在，自荷蘭人來陣前，已經有十幾支原住民，發展𪜶的特殊生活方式佮語言。四百年前開始佇安平，至少有葡萄亞語、西班牙語、日語、馬來語、閩南語被使用。
咱台灣本來就是一个真有包容能力的好所在，嘛使人會當逐家和平逗陣，互相語言學習、溝通，甚至作伙成長。上可惜的是國民政府錯誤又閣暴力的漢語政策，煞將咱隔分，除了族群分裂以外，原本講台語的人煞將母語放袂記。
咱愛重新看家己的歷史，知影這塊土地上有真濟語言通好使用，嘛有豐富的人文使人精神生活比別的國家閣較曠闊，上重要的是咱必須愛講家己的母語，看重咱的文化價值，才會當平等共其他語言佮文化的人，達成思想交流，嘛仝時陣將咱台語文化的精華分享予別人。
若是佇台灣的每一个人攏會當使用家己的母語，咱才會當互相交流求進步，所以幫助咱的囝仔佇生活當中，尤其是利用節日佮儀式體會台語的美妙，才是予母語永遠有活力的方法。