文：Le̍k-hiân （台語路–台語囡仔共學團、大人囡仔鬥陣行共學團成員）
「牽囡仔ê手 行台語ê路」是一陣kah囡仔講台語ê家長組成親子團體，阮堅心按呢做，是希望囡仔會使保有家己ê語言文化，成做自信、勇敢ê台灣人，毋過這件代誌有一个誠重要ê前提，就是大人愛學習去尊重囡仔， #莫拍囡仔 就是上基本ê。
阮這iân ê父母，加減攏是佇「囡仔人有耳無喙」的大環境下跤大漢ê，這馬，阮願意對家己做起，莫用 #威權 和 #暴力 來養飼囡仔。
但是，面對囡仔教養上ê各種狀況，若是莫用拍ê，到底會使按怎做？做爸母是足需要學習、嘛足需要資源。這擺人本教育基金會發起「430 國際莫拍囡仔日：起造愛的厝，我無拍囡仔！」（430 國際不打小孩日：打造愛的家，我不打小孩！）活動。
430 國際莫拍囡仔日，是一个提升兒童權利ê運動，是協助、支持家長ê運動，嘛是一个治療復原規个社會過去hông暴力對待ê運動。好親像阮kah囡仔講母語，是為著修復過去語言政策留hō͘全台灣人民ê心靈傷痕仝款。
咱會使 #以啟發代替懲罰（í khé-hoat tāi-thè têng-hoa̍t），#停止暴力重複發生ê循環（thêng-chí po̍k-le̍k tiông-ho̍k hoat-seng ê sûn-hoân），做伙建立一個「莫拍囡仔」ê新社會、新國家，咱做會到！
「430 國際莫拍囡仔日：起造愛的厝，我無拍囡仔！」
活動連結：https://fb.me/e/1HIWCDY1a
逐家mā會使用台文參加抽獎活動喔！ 公視報導：https://news.pts.org.tw/article/522986