文：Khá-huī（桃仔園台語囡仔共學團參加者)
進前，咧歇睏日攏去台北學白話字，這三、四個月真歹行會開跤。這禮拜總算有時間閣來參加桃園共學。雖然是烏陰天，毋過大人、囡仔逐个攏真歡喜。
上代先是自我紹介ê hello歌，今仔日ê大人含囡仔有小可仔濟，唱一大輾才煞。
第一節是體育課ê大風吹，年紀較大ê囡仔傱來傱去，真趣味。
第二節是音樂跳舞課。王金選老師ê聖誕老阿伯，佇網路頂點看數已經超過360萬擺–矣，今仔日閣加10擺。
第三節是品行課，今仔日ê主題是雄雄狂狂ê聖誕老阿伯。欲共囡仔講所有ê代誌攏愛先準備予好勢，才袂臨時臨曜雄雄狂狂。
紲落去是有智識ê母語課，台羅拼音。四个聲母(玻璃ê p、葡萄ê ph、門 ê m、帽仔ê b)，這點予我真欽佩嘛真歡喜，干焦用卡片佮簡單ê節奏，囡仔就會使記牢牢。邊仔幾偌个媽媽笑講明年做伙考A級。按呢，後個月ê母語課閣愛繼續！
落尾是美工課，家己做媠媠ê聖誕樹。講實在–ê，囡仔共紙鉸開ê時，阿母我一直感覺是夜市仔ê烘鰇魚！(小梁，歹勢–啦！)
下課進前是食點心ê時間，麻糍滒芳芳ê塗豆糖粉，逐个有食閣有掠！
有一站仔無參加矣，多謝遮爾濟ê媽媽互相關心最近ê狀況，予阮感覺真溫暖。桃仔園台語囡仔共學團，期待後擺再相會！
編按：相片內底是小梁ê表妹佇共學現場畫出來ê圖，阮遮ê好朋友實在攏足有才–ê–lah!