我愛承認台灣的廟寺文化對我來講，是一个『痛點』，前一站仔艋舺青山宮咧鬧熱，我有𤆬囡仔去看，囡仔對七爺八爺的故事誠有興趣，毋過，我干焦會曉解說in是出來趕妖魔鬼怪爾爾，其他的神將佮廟寺文化我就袂曉講。
顛倒咧過基督教的聖誕節的時陣，我會𤆬囡仔畫聖誕樹仔，會解說講聖誕老先生會攢禮物ho͘囡仔，我閣會𤆬囡仔去新北耶誕城看熱鬧。毋過，我嘛無咧信基督教，有當時仔嘛會感覺是按怎我顛倒過西方的節日。
開始佮囡仔講台語了後，我就較有想欲𤆬囡仔 #認捌本土文化。拄好台語路舉辦蘆洲忠義廟小神將體驗活動，囡仔會當戴三太子尪仔，大人嘛會當體驗佇大仙尪仔內的感覺，機會真難得。
#認捌西方的文化進前_若是了解家己的文化_就會當發展家己新的做法活動彼工，拄仔好忠義廟為著廟的生日，舉辦「禮斗法會」。耶穌生日，逐家慣勢看著聖誕樹，因為佇較寒的國家較捷看著松仔樹。若是台灣的廟的生日咧？會攢啥物？阮看著道士用米雕龍佮字咧慶祝，真特別，這就是用在地的物產來慶祝生日。按呢講起來，若是耶穌的生日欲在地化，我會當𤆬囡仔用米畫in佮意的圖。講起來干焦淡薄仔笑詼，毋過，我相信，認捌西方的文化進前，若是會當了解家己的文化，就會當做比較，嘛會當發展家己新的做法，袂楞楞仔（gông-gông-a）綴爾爾。
這擺的重點是熟似神將，廟方的柯秘書解釋，神將就是「#軍方」，八家將是「#警方」。神將有三尺高，in 的衫嘛真特別，蘆洲的神將閣有梅花，聽講是當初蔣經國看著真佮意，想欲囥佇總統府，毋過地方的人無答應，後來，蔣經國就頒發身份證ho͘o彼當時的四尊神將。這就是蘆洲的神將會有梅花的由來。後擺我若是看著咧鬧熱的神將，就會曉𤆬囡仔認捌in 的衫的特色。
我上期待的活動，就是 #體驗大仙尪仔。佮尪仔Long入去行路，才知影毋是遐爾簡單的代誌，有夠重，嘛無好幌，做神將真無簡單，我開始佩服遐咧做神將的人矣！
這擺的台語路小神將體驗活動，規家伙仔4个人參加才300箍。聽講是主辦單位佮廟方為著欲推廣本土文化佮語言才會遮爾俗。
閣來，ho͘逐家笑一咧，看我佇影片內表演。。。