語言是工具，毋是目的，更加毋是來比較啥人較gâu
台灣多語言咖啡 Taiwan Multilingual Cafe 活動紀實
文：米花(台語路–台語囡仔共學團團員)
佮囡仔講台語欲三年冬，頭一擺有機會用台語參加國際性的活動「一秒偽出國」，這是一个超過25種語言的文化交流。逐家一定真好奇，按呢是愛用啥物語言交流？阿啄仔敢聽有台語？我欲去進前，一直感覺毋知欲按怎做較好。
後來我查著，這个活動推捒「唚水式」的語言學習，就是佇母語人士的自然環境學習語言，所以若是聽無嘛袂要緊，重點就是hōo家己有機會去體會使用。來參加的人，攏是對語言真有興趣的，嘛有足濟人當咧學習無仝款的語言。
來參加台語講座的人，攏真好奇欲按怎用羅馬字寫台語，嘛分享家己使用台語的經驗，逐家攏是佮序大人才講台語，嘛感覺這馬無啥機會用台語講話。我佇講座佮逐家分享，一个語言，就是一種思考的方式，親像華語的「章魚」，台語會當叫「石距」，因為石距定定覕佇石頭仔邊仔。無仝語言，看的方式就會無仝。
我嘛邀請逐家轉去厝內，問家己的序大人自細漢的語言經驗，佇學校講的語言是按怎會佮厝內的無仝？嘛會當觀察厝內囡仔的語言使用狀況，按呢就是家族珍貴的語言使用歷史。
除了台語講座，我嘛揣機會佮無仝國家的人交流。佇越南語的講座，阮討論越南語的羅馬字佮台語的羅馬字有啥無仝，越南語有六個聲調，台語是七聲八調，兩種語言用的聲調符號嘛無仝。
愈濟交流，會愈發現無仝款語言的趣味。台灣人是特別重視英語，攏真驚家己的囡仔的英語程度會綴人袂tio̍h。其實，我感覺比語言閣較重要的，顛倒是人對人的好奇、猶閣有增加豐富的生活經驗跟觀察。語言是工具，毋是目的，更加毋是來比較啥人較gâu。
這擺，我主要是去代表台語路，分享佮囡仔講台語的經驗。台語嘛會當代表台灣做國際交流，這毋但是英語做會到爾爾。